Col 1 | PONPDN | STEP | PAULUS wanporon en Kristus Iesus amen pan kupur en Kot o ri atail Timoteus,

Colossians 1

1 PAULUS wanporon en Kristus Iesus amen pan kupur en Kot o ri atail Timoteus, 2 Oni ri at saraui o lelapok ren Krisus akan, me mi Kolose; mak o popol san ren Kot Sam atail o Kaun Iesus Kristus! 3 Kit kin danke Kot o Sam en atail Kaun Iesus Kristus o kapakapa kin komail kaukaule. 4 Kit lao ronadar duen omail poson Kristus Iesus, o omail limpok on saraui kan karos, 5 Pweki kaporopor eu, me nekineki on komail nanlan, duen me komail ronadar mas o ni padak melel en ronamau, 6 Me lei won komail o pil sap akan karos, o a kin wada o kakairida dueta re omail san ni ran o, me komail ronadar o dedekier melel mak en Kot; 7 Duen omail padakki san ren Epapras at warok kompok amen, me papa lelapok en Kristus on komail amen, 8 Me pil kaireki don kit duen omail limpok pena ni Nen. 9 I me se sota kin dukedi san at kapakapa kin komail o poekipoeki san ni ran en at ronadar, pwe komail en direki erpit en kupur a, o komail en lolekon o koiok nenin, 10 O kekeid wei duen me kon on Kaun o, o kapareda wan wiawia mau karos, o kakairida ki asa Kot, 11 O keleki kel karos duen manaman en a linan pwen dadaurata o kanonamalu peren, 12 Danke Sam o, me kotin kamau kitail lar, en ian pwaisaneki ioso en me saraui kan nan marain. 13 Me kotin kapiti san kitail manaman en rotorot, ap kotin kasau kitail don nan wein Na kompokepa, 14 Me kotin dore kitail la iei lapwan dip atail, 15 I me kasale pan Kot, me so sansal, me meseni en audepa karos. 16 Pwe karos wiauiki i, karos me mi nanlan o sappa, me sansal o me so sansal, ma me poe kan, de saumas akan, de wei kan, de manaman akan, meakaros wiauiki i o on i. 17 O i me kotikot mon meakaros o meakaros memaureki i. 18 O i tapwin war a, iei momodisou, o i me tapi o meseni en me iasadar san ren me melar akan, pwe i en mon meakaors. 19 Pwe Kot kotin kileledier me mau kan karos en mi re a. 20 I ari kalolamau penan pein I meakan karos, ma ni sappa de nanlan, ni a kotin wiada muei mau ki ntan a lopu. 21 O komail, me doo wei san o imwintiti mas o ni omail lamelame o wiawia sued akan, 22 A kotin kalolamau komail lar ki war a uduk ni a matala, pwen kapware kin komail da saraui o pun o so kadeik pa omail mo a. 23 Ma komail dadaurata poson o teneten o so mokid wei san ni kaporopor ki ronamau, me komail ronadar, o me lolok on audepa karos me mi pan lan, me nai Paulus wialar papa men. 24 I ap perenki ai kalokolok ki komail o men kaimwisok kila uduk ai me luedi ni kamekam en Kristus, pweki war a, iei momodisou, 25 Me i wialar papa men duen koa dodok en Kot, me i aleer pweki komail pwen usela mas an en Kot. 26 Iei me rir kot, me rir san nin tapin kaua o men kaua, a met a kadiarok on sapwilim a saraui kan, 27 Me Kot men kasansaleda kapwapwa en linan en rir wet on men liki kan, iei Kristus me kotikot lol omail, i kaporopor en linan. 28 I me kit kin padaki o pane panaui aramas karos, o padapadaki aramas karos ni lolekon karos, pwe kit en kapwareda aramas karos ni unsoki on Kristus. 29 I me i pil dodok kelail, duen wiawia en i me kin dodok kelail lol i.